په افغانستان کې پر موسیقۍ د ا.ا.ا له خوا لګول شوي بندیز ګڼ سندرغاړي او سازغږوونکي له سختو اقتصادي ستونزو سره مخ کړي دي. رسنیو د یکشنبې په ورځ په یوه راپور کې د څو هنرمندانو کیسې خپرې کړې چې وايي د موسیقۍ له بندېدو وروسته یې د عاید سرچینه له منځه تللې او اوس د کورنۍ د خرڅ لپاره پور اخلي.
۳۵ کلن سندرغاړي ضیا سحر، چې د راپور له مخې درې ماشومان یې په تلسیمیا اخته دي، رسنیو ته ویلي چې ګڼو کارونو ته یې لاس اچولی، خو دا چې لسیزې یې له هنر سره تېرې کړې، په بل کسب کې بریالی نه شو او اوس یې ژوند په قرض روان دی.
په ننګرهار کې یو بل سندرغاړي، چې نه غواړي نوم یې واخیستل شي، ویلي چې اوس په یوه سلماني کې کار کوي او د ورځې له سلو افغانیو ډېر نه شي ګټلای. یو رباب غږوونکي، چې په وینا یې پر دې وروستیو له خیبرپښتونخوا راستون شوی، ادعا کړې چې په جلالاباد کې یې د سبزیو پلور لپاره لاسي کراچۍ پیل کړه، خو د ښاروالۍ کارکوونکو دوه ځله ترې ټوله کړې ده.
دغه هنرمندان غواړي لږ تر لږه د لاوډسپیکر پرته وړو او ساده موسیقيزو پروګرامونو ته اجازه ورکړل شي. خو د ا.ا.ا ویاند ذبیحالله مجاهد مخکې ویلي چې موسیقي حرامه ده او په افغانستان کې به یې هېچا ته اجازه ورنه کړل شي. د رسنیو د راپورونو له مخې، ځینې دیني عالمان بیا وايي چې موسیقي د مذهبونو ترمنځ اختلافي موضوع ده. د غیررسمي اټکلونو له مخې، په افغانستان کې د سندرغاړو او سازغږوونکو شمېر شاوخوا شل زره کسانو ته رسېږي.
نظرونه (۰)
تر اوسه کوم نظر نشته. لومړی نظر تاسو ولیکئ.