د کابل یو شمېر اوسېدونکي وايي، د ښار په زړه کې تېر شوی کابل سیند د کثافاتو په ځای بدل شوی او بد بوی، ماشي او ناروغۍ یې خلک ځوروي. رسنیو ته یوه اوسېدونکې وویل، اوس چې په سیند کې اوبه کمې دي، په ځانګړې توګه هغه پلورونکي چې په لاسي کراچیو مېوه او سبزي پلوري، خپل کثافات سیند ته اچوي.
د کابل د لومړۍ ناحیې یوه اوسېدونکي بیا وویل چې د خلکو ترڅنګ ښاروالۍ هم د سیند د پاکولو په برخه کې خپل مسوولیت نه دی ادا کړی. د کابل ښاروالۍ فرهنګي سلاکار نعمتالله بارکزي رسنیو ته وویل، ښاروالۍ د سیند سروې پیل کړې، لومړی به زیانمنې سیمې په ګوته شي او بیا به د پاکولو کار پیل شي؛ هغه له ښاریانو وغوښتل چې کثافات یوازې ټاکل شویو ځایونو ته واچوي.
د ا.ا.ا اړوند، له پېښو سره د مبارزې د چمتووالي ادارې مشر نورالدین ترابي د تلې پر ۲۱مه د پېښو د خطر د کمولو د نړیوالې ورځې په غونډه کې ویلي و چې د سیند پاکول شاوخوا یو میلیون ډالره لګښت غواړي او له مرستندویه هېوادونو او موسسو یې مرسته غوښتې ده. د هغه په وینا، کابل سیند وروستی ځل په ۲۰۰۹ او ۲۰۱۰ کلونو کې پاک شوی و. رسنیو د تلې په پیل کې راپور ورکړی و چې دا اداره او ښاروالۍ د کمپنۍ له سیمې تر څرخي پله پورې د سیند تخنیکي سروې پیل کړې، څو د رسوباتو کچه معلومه او د سېلابونو خطر کم شي.
کابل سیند د پغمان له غرونو سرچینه اخلي او شاوخوا ۷۰۰ کیلومتره اوږدوالی لري. کارپوهان وايي، د ککړتیا د مخنیوي لپاره باید سیند ته د ناتصفیه فاضله اوبو تګ ودرول شي او د سیند غاړې په منظم ډول پاکې وساتل شي.
نظرونه (۰)
تر اوسه کوم نظر نشته. لومړی نظر تاسو ولیکئ.