د امریکا ولسمشر ډونلډ ټرمپ یو ځل بیا د ایران پر ضد د پوځي اقدام احتمال یاد کړ، خو زیاته یې کړه چې واشنګټن او تهران ښايي یوې هوکړې ته هم ورسېږي.
هغه په فلوریډا کې د منځمهالو ټاکنو لپاره له وخت مخکې رایې ورکولو وروسته خبریالانو ته وویل چې ښايي دا کار بشپړ کړي یا ایران هوکړه وکړي. د پرېکړې د وخت په اړه یې وویل چې «ښايي ان سبا»، خو جزییات یې ونه ویل.
ټرمپ ټینګار وکړ چې موخه یې دا ده چې ایران هېڅکله اټومي وسلې ته لاسرسی ونه لري، خو د هرې احتمالي هوکړې په اړه یې د تهران پر ژمنتیا شک وښود.
دا څرګندونې په داسې حال کې دي چې ټرمپ د اکتوبر پر اتمه ویلي وو د نومبر له درېیمې نېټې ټاکنو مخکې به پر ایران نوی برید نه کوي. د فبرورۍ له ۲۸مې راهیسې پیل شوې شخړه لا هم روانه ده.
پخواني ولسمشر بارک اوباما په اوهایو کې په یوه غونډه کې پر ټرمپ نیوکه وکړه او ویې ویل چې د ۲۰۱۵ اټومي تړون د ایران مخه له جګړې پرته نیولې وه.
نظرونه (۰)
تر اوسه کوم نظر نشته. لومړی نظر تاسو ولیکئ.