د افغانستان کرکټ ملي لوبډله نن دوشنبه، د اکتوبر په ۱۹مه، د افغانستان، بنګلهدېش او زیمبابوې ترمنځ د یو ورځنیو لوبو د درې اړخیزې لوبلړۍ لومړۍ لوبه له زیمبابوې سره کوي. د افغانستان کرکټ بورډ ویلي، لوبه د افغانستان په وخت مازدیګر ۴ بجې د ابوظبي په زاید کرکټ لوبغالي کې پیلېږي.
زیمبابوې د شنبې په ورځ د لوبلړۍ په پرانیستې لوبه کې بنګلهدېش ته د ۹۹ منډو په توپیر ماتې ورکړه. زیمبابوې په ۵۰ اوورونو کې د ۸ لوبغاړو په بایللو ۲۷۱ منډې جوړې کړې، چې کریګ اروین ۹۳ او برېنډن ټېلر ۸۱ منډې پکې درلودې؛ بنګلهدېش بیا په ۳۳.۴ اوورونو کې ۱۷۲ منډې وکړې او ټول لوبغاړي یې وسوځېدل.
د افغانستان لوبډلې مشري رحمت شاه کوي او رحمانالله ګربز یې مرستیال دی. راشد خان، محمد نبي، عظمتالله عمرزی او فضلحق فاروقي هم په دې لوبډله کې شامل دي.
افغانستان به د اکتوبر په ۲۱مه د شارجې په لوبغالي کې له بنګلهدېش سره هم لوبه وکړي. دوه غوره لوبډلې به د اکتوبر په ۲۳مه په وروستۍ لوبه کې سره مخامخ شي. افغانستان د دې لوبلړۍ کوربه دی او دا لوبې د ۲۰۲۷ کال نړیوال جام ته د چمتووالي برخه ګڼل کېږي.
نظرونه (۰)
تر اوسه کوم نظر نشته. لومړی نظر تاسو ولیکئ.