پاکستان د شنبې له ورځې، د اکتوبر له ۱۷مې راهیسې، د بلوچستان ایالت په دوو رسمي سرحدي دروازو، تفتان او ګبد-ریمدان کې، له ایران سره سوداګري درولې ده. رسنیو دا خبر ورکړی دی. رسنیو لیکلي چې د پاکستان د سوداګرۍ وزارت یو یادښت صادر کړی چې له مخې یې د اکتوبر د درېیمې نېټې یو پخوانی حکم لغوه شوی، خو په یادښت کې د دې پرېکړې لامل نه دی ښودل شوی.
چارواکي وايي دا ګام لنډمهاله دی. د چاغي مرستیال کمشنر بختیار اسماعیل رسنیو ته ویلي چې پوله د امنیتي دلایلو له امله او د ترهګرۍ ضد هڅو په موخه د سرحدي مدیریت د ښه کولو لپاره تړل شوې ده. د بلوچستان د اعلی وزیر سلاکار شاهد رند ویلي، موخه یې د امنیتي اندېښنو هوارول او د قاچاق مخنیوی دی او د دواړو هېوادونو د لوړپوړو چارواکو ترمنځ د خبرو د پرمختګ له امله ښايي پوله ژر بېرته پرانیستل شي. د ایران د بهرنیو چارو وزارت ویاند اسماعیل بقايي هم دا ځنډ لنډمهاله بللی او ځینو «تخنیکي ستونزو» پورې یې تړلی دی.
د کوټې د سوداګرۍ او صنایعو خونې ویلي، د پولې دواړو غاړو ته شاوخوا دوه زره باروړونکي موټر ودرېدلي دي او سوداګرو ته یې سپارښتنه کړې چې له ایران سره نوي فرمایشونه ونه کړي. په ګبد کې د سوداګرو د یوې اتحادیې مشر عبدالغفور هوت رسنیو ته ویلي چې یوازې له همدې لارې هره ورځ شاوخوا ۵۰۰ باروړونکي موټر له ایرانه پاکستان ته توکي راوړي او همدومره موټر بلې خوا ته ځي. رسنیو لیکلي چې له ګبد-ریمدان لارې هره ورځ تر څلور زره ټنو ډېره مایع ګاز (الپيجي) پاکستان ته واردېږي او اندېښنه شته چې په کراچۍ کې د ګازو کمښت لا زیات شي.
د ایران د ترانزیټ دفتر مشر حسین حسیني ویلي چې مسافر لا هم د ګبد-ریمدان له لارې تګ راتګ کولی شي، خو رسنیو راپور ورکړی چې د تفتان د کډوالۍ دروازه د اسلاماباد په امر تړل شوې ده. بلخوا، د پاکستان د اطلاعاتو وزارت په ټولنیزو رسنیو کې هغه ادعاوې رد کړې چې ګواکې د امریکا سمندري ځواک د ایران پر ضد عملیاتو لپاره د پاکستان سمندري حدود کاروي.
نظرونه (۰)
تر اوسه کوم نظر نشته. لومړی نظر تاسو ولیکئ.