د ایران د بهرنیو چارو وزیر عباس عراقچي د امریکا ولسمشر ډونالډ ټرمپ هغه خبرداري ته ځواب ویلی چې ویلي یې وو، که ایران ژر خپله لاره بدله نه کړي، امریکا به ډېر ژر «کار پای ته ورسوي».
عراقچي د یکشنبې په ورځ په ایکس پاڼه ولیکل: «تېر ځل چې تاسو غوښتل کار پای ته ورسوئ، ایران تر پخوا پیاوړی راووت. غواړئ بیا خپل بخت وازمویئ؟ بسم الله. خو پام کوئ، موږ هم نیمګړې چارې لرو.» هغه د اسرائیل لومړی وزیر بنیامین نتانیاهو هم تورن کړ چې د دې لپاره امریکا بلې جګړې ته کشوي چې له زندان ځان وژغوري، که څه هم پایلې یې د اسرائیل او حتی د امریکا د ولسمشر لپاره هر څه وي.
د عراقچي دا خبرې څو ساعته وروسته له هغه وشوې چې ټرمپ د اکتوبر له ۲۷مې د اسرائیل له ټاکنو مخکې له نتانیاهو «بشپړ او هر اړخیز» ملاتړ اعلان کړ او ویې ویل چې ایران له پوځي او مالي پلوه «په سیستماتیک ډول» ځپل شوی دی. نتانیاهو هم په ځواب کې ولیکل چې «یوځای به کار پای ته ورسوو.»
د ایران د سپاه پاسداران ویاند حسین محبي هم د یکشنبې په ورځ خبرداری ورکړ چې د ایران پر انرژۍ تاسیساتو هر ډول برید به د دې هېواد ځوان ساینسپوهان ژر ورغوي، خو د هغه په وینا، دا کار به «اشغال شوې سیمې د تل لپاره په سوځېدلې ځمکې بدلې کړي.»
امریکا او اسرائیل د فبرورۍ پر ۲۸مه پر ایران جګړه پیل کړې وه. په سیمهییزو اوبو کې هم کړکېچ دوام لري؛ د بریتانیا د سمندري سوداګرۍ عملیاتو ادارې (UKMTO) د یکشنبې په ورځ وویل چې د متحده عربي اماراتو د خورفکان شمال ختیځ ته یوه کښتۍکشه بېړۍ د دوو نامعلومو پرتابو په لګېدو زیانمنه شوې او یو تن یې لږ ټپي شوی دی. ایران د افغانستان لوېدیځ ګاونډی دی او په لسګونو زره افغانان هلته ژوند او کار کوي.
نظرونه (۰)
تر اوسه کوم نظر نشته. لومړی نظر تاسو ولیکئ.