اسلامي همکارۍ سازمان وايي، د افغان ښځو او نجونو د زدهکړې او کار د حق په اړه به له کابل سره خپلو خبرو ته دوام ورکړي.
د دې سازمان عمومي منشي د شنبې په ورځ په بغداد کې د بهرنیو چارو د وزیرانو د شورا د ۵۲مې غونډې په پرانیسته کې وویل: «په افغانستان کې به د اسلامي ارزښتونو پر بنسټ د ښځو او نجونو د زدهکړې او کار د حقونو په اړه له واکمنو چارواکو سره خبرې جاري ساتو او د افغان خلکو د بشري او اقتصادي اړتیاوو ملاتړ به کوو.» هغه د ماشومانو او لږکیو پر حقونو هم ټینګار وکړ.
د رسنیو د راپورونو له مخې، د ترکیې د بهرنیو چارو وزیر هاکان فیدان وویل چې په افغانستان، سوډان او سومالیا کې وضعیت ننګونکی دی او باید د غونډې د اجنډا په سر کې وي.
د رسنیو د راپورونو له مخې، په دې دوه ورځنۍ غونډه کې چې د یکشنبې په ورځ پای ته رسېږي، د افغانستان استازی نه شته. دا غونډه د «خبرې او یووالی؛ د سولې او دوامداره پراختیا دوه بنسټیز ستني» تر شعار لاندې جوړه شوې ده. سازمان دا نه دي ویلي چې کابل د نجونو د زدهکړو په اړه یې غوښتنو ته څه ځواب ورکړی. په همدې غونډه کې عراق له ترکیې د سازمان دورهيي مشري ترلاسه کړه.
په افغانستان کې له پنځو کلونو زیات وخت کېږي چې له شپږم ټولګي پورته نجونو ته د ښوونځي دروازې تړلې دي او ښځې پوهنتونونو ته هم نه شي تللی. د اسلامي همکارۍ سازمان ځانګړی استازی طارق علي بخیت پدې وروستیو کې کابل ته تللی و او بیا یې غړو هېوادونو سفیرانو ته د بشري وضعیت او پراختیايي ننګونو په اړه معلومات ورکړل.
نظرونه (۰)
تر اوسه کوم نظر نشته. لومړی نظر تاسو ولیکئ.