د ایران پارلمان د یکشنبې په ورځ مهرداد اخلاقي کتابچي ته د دفاع او وسلهوالو ځواکونو د لوجستیک د وزیر په توګه د باور رایه ورکړه. رسنیو راپور ورکړی چې ۲۳۷ استازو یې په ګټه او ۱۵ تنو یې پر ضد رایه ورکړه. پارلمان د فبرورۍ له ۲۸مې، چې د امریکا او اسراییلو جګړه له ایران سره پیل شوه، خپلې غونډې آنلاین جوړوي.
اخلاقي د پخواني وزیر عزیز نصیرزاده ځای نیسي چې د جګړې په لومړۍ ورځ د امریکا او اسراییلو په بریدونو کې وژل شوی و. د رسنیو د راپورونو له مخې، تر اوسه دا څوکۍ په لنډمهاله توګه مجید ابنالرضا درلوده چې اوس به د نوي وزیر مرستیال وي.
۶۸ کلن اخلاقي له ۴۲ کلونو ډېر د ایران د دفاع په وزارت او اړوندو ادارو کې کار کړی او د بالستیکو توغندیو، جامد سونګ او فضايي ټکنالوژۍ متخصص ګڼل کېږي. هغه مخکې د شهید باقري صنعتي ګروپ، د فضايي صنایعو سازمان او د دفاعي صنایعو سازمان مشري کړې ده. رسنۍ لیکي چې امریکا ۱۹ کاله مخکې پر ده بندیز لګولی او نوم یې د ملګرو ملتونو د امنیت شورا په ۱۷۴۷ پرېکړهلیک کې هم راغلی دی.
ولسمشر مسعود پزشکیان د رایې پر مهال وویل چې پر اخلاقي د امریکا بندیز او د «ترور په لیست» کې د هغه شتون د ده د وړتیا نښه ده. د رسنیو د راپورونو له مخې، اخلاقي په خپلو لومړیو څرګندونو کې د ترمپ ادارې هغه ګواښ ته اشاره وکړه چې د «ټولو بمونو مور» د کارولو خبره یې کړې وه او ویې ویل چې ایران «چمتووالی نیولی دی». ایران د افغانستان لوېدیځ ګاونډی دی.
نظرونه (۰)
تر اوسه کوم نظر نشته. لومړی نظر تاسو ولیکئ.