د رسنیو د راپورونو له مخې، د ننګرهار د مرکز جلال اباد ښار د انګورباغ سیمې لسګونه کورنۍ وايي چې د ا.ا.ا سیمهییزو چارواکو له خپلو کورونو ایستلې او اوس بې سرپناه پاتې دي.
اوسېدونکي ادعا کوي چې شاوخوا څلور لسیزې په دې سیمه کې اوسېږي او د جلال اباد ښاروالۍ له خوا ورکړل شوي قانوني اسناد لري. په ټولنیزو رسنیو کې د یوې ښځې ویډیو په پراخه کچه خپره شوې چې په ژړا مرسته غواړي او وايي اوس له خپلو کوچنیو ماشومانو سره د سړک پر غاړه ژوند کوي. هغې وویل: «موږ شرعي قبالې لرو، پنځه څلوېښت کاله کېږي چې دلته اوسېږو.»
د راپور له مخې، په شاوخوا اتو جریبو ځمکه ۳۹ کورونه جوړ شوي وو. د ا.ا.ا د سترې محکمې مرستیال ویاند قاري منصور احمد حمزه په یوه غږیز پیغام کې ویلي چې د محکمې د پرېکړې له مخې دا ځمکه شخصي ملکیت ثابته شوې او د ننګرهار ولایتي ادارې ته امر شوی چې تخلیه یې کړي او اصلي مالک ته یې وسپاري.
د ننګرهار د رسنیو دفتر هم یوه ویډیو خپره کړې چې په کې وايي ځمکه د محکمې د پرېکړې پر بنسټ تخلیه شوې ده. په ویډیو کې حاجي بهرام نومي سړی ځان د ځمکې اصلي وارث بولي او وايي قباله لري او د تېر حکومت پر مهال یې عریضو ته پام نه و شوی.
رسنۍ وايي، ولایتي ادارې او ښاروالۍ یې پوښتنو ته ځواب ورنه کړ او دا روښانه نه ده چې اوسېدونکو ته په محکمه کې د اسنادو د وړاندې کولو فرصت ورکړل شوی و که نه. اوسېدونکي غواړي چې بدیله سرپناه ورته برابره شي.
نظرونه (۰)
تر اوسه کوم نظر نشته. لومړی نظر تاسو ولیکئ.