د روسیې د بهرنیو چارو وزیر سرګي لاوروف وايي هېڅ شک نه لري چې افغانستان او پاکستان دواړه د خپلو اړیکو عادي کولو ته لېوال دي، که څه هم د دواړو اختلاف د مسکو د وروستۍ غونډې د ګډې اعلامیې مخه ونیوله.
ښاغلي لاوروف د سهشنبې په ورځ په مسکو کې په یوه خبري کنفرانس کې د مسکو فارمټ په اتمه غونډه کې د وروستي سند نه منل «ناخوښوونکی» وباله، خو ویې ویل چې باید تراژیدي ونه ګڼل شي، ځکه د دې کړکېچ ریښې له مخکې د اټکل وړ وې. هغه زیاته کړه چې روسیه به د دواړو ترمنځ د ستونزو په هوارولو کې مرستې ته دوام ورکړي.
لاوروف د دې ترینګلتیا لوی لامل داعش او ورسره تړلې ډلې وبللې، چې د هغه په خبره په دواړو هېوادونو کې بریدونه کوي. هغه له سیمې بهر هېوادونو وغوښتل چې لاسوهنه بنده کړي.
د روسیې د ولسمشر ځانګړي استازي ضمیر کابلوف مخکې ویلي وو چې د ا.ا.ا پلاوي د اعلامیې په مسوده کې له تروریزم سره د افغانستان په تړاو له حده زیاتو یادونو اعتراض کړی و. د هغه په وینا، ورته متن په تېرکالنۍ اعلامیه کې هم شامل و، خو ا.ا.ا استدلال کاوه چې له پاکستان سره یې اړیکې له هغه وخته بدلې شوې دي.
د تلې په ۱۳مه (اکتوبر ۵) په دې غونډه کې د روسیې، چین، پاکستان، ایران، هند او منځنۍ اسیا د څلورو هېوادونو استازو ګډون کړی و.
د غونډې په څنډه کې د ا.ا.ا د حکومت د بهرنیو چارو وزیر امیر خان متقي د افغانستان لپاره د چین له ځانګړي استازي یو شیاویونګ سره هم ولیدل. د ا.ا.ا د بهرنیو چارو وزارت په وینا، دواړو لوریو په دوه اړخیزو اړیکو او سیمهییز وضعیت خبرې وکړې او یو شیاویونګ د سیمهییز ثبات او د افغانستان د اقتصادي او سیمهییزې نښلونې لپاره پر ګډو هڅو ټینګار وکړ.
سرچینه: آریانا نیوز، خامه پرس، افغانستان انټرنشنل، پژواک خبري اژانس
نظرونه (۰)
تر اوسه کوم نظر نشته. لومړی نظر تاسو ولیکئ.