فرانسې د هغو افغان اتباعو د بېرته افغانستان ته د لېږلو د اسانتیا لپاره له ا.ا.ا سره خبرې پیل کړې دي چې په دې هېواد کې قانوني اوسېدنه نه لري. دا خبره یوې ډیپلوماتیکې سرچینې د چهارشنبې په ورځ فرانس پرس ته کړې ده.
د دې سرچینې په وینا، د نورو اروپايي هېوادونو په څېر، یو «تخنیکي ډیالوګ» پیل شوی څو هغه افغانان مستقیم افغانستان ته واستول شي چې قانوني اسناد نه لري او د عامه نظم لپاره ګواښ ګڼل کېږي. د ار اېف اي راډیو د راپور له مخې، سرچینې دا ګام د فرانسې د وګړو د امنیت لپاره اړین بللی دی.
سرچینې د هغو کسانو شمېر نه دی ښودلی چې کېدای شي واېستل شي، خو یوې بلې خبرې سرچینې ویلي چې دا شمېر ښايي «سلګونو» ته ورسېږي. فرانس ۲۴ د سرچینې په حواله لیکلي چې عملي لارې چارې لا تر غور لاندې دي.
فرانسې د ۲۰۲۱ کال له اګسټ راهیسې له کابل سره ډیپلوماتیکې اړیکې نه لري او په کابل کې یې سفارت تړلی پاتې دی. د فرانس پرس په وینا، فرانسه له المان، بلجیم او سویډن په ګډون د اروپايي ټولنې له هغو شاوخوا ۲۰ هېوادونو سره یوځای شوې چې غواړي د افغانانو، په ځانګړي ډول د محکمو له خوا محکوم شویو کسانو، بېرته لېږل چټک کړي.
سرچینې ټینګار کړی چې دا خبرې د افغانستان په اړه د فرانسې دریځ نه بدلوي او پاریس به د افغان خلکو، په تېره د افغان ښځو ملاتړ ته دوام ورکړي. د فرانسې د بهرنیو چارو وزارت دا پوښتنه بې ځوابه پرېښې چې ایا د ا.ا.ا استازي به فرانسې ته د سفر اجازه ولري که نه. افغانستان انټرنشنل لیکلي چې دې وزارت لا په رسمي ډول د دې خبرو د پیل تایید نه دی کړی.
سرچینه: فرانس پرس (د ۲۴ نیوز، ار اېف اي او فرانس ۲۴ له لارې)، افغانستان انټرنشنل
نظرونه (۰)
تر اوسه کوم نظر نشته. لومړی نظر تاسو ولیکئ.