د افغانستان په شمال ختیځ کې د بدخشان ولایت مرکز فیض اباد ښار د چهارشنبې په ورځ (د تلې ۱۵مه / اکتوبر ۷) سهار وختي د یوې چاودنې شاهد و، چې د تلفاتو په اړه یې سره متضاد روایتونه خپاره شوي دي.
په بدخشان کې د ا.ا.ا د امنیې قوماندانۍ ویاند احسانالله کامګار وویل چې په یوه ګلدان کې پټ شوي چاودېدونکي توکي د ښار د هنګر په سیمه کې د یوه ټویوټا کرولا موټر ترڅنګ وچاودل. د هغه په وینا، په موټر کې سپاره دوه ملکي کسان په سطحي ډول ټپیان شوي، څلور شکمن کسان نیول شوي او پلټنې روانې دي.
د ا.ا.ا مخالفې وسلهوالې ډلې «د افغانستان د ازادۍ جبهې» د دې برید مسؤلیت منلی دی. دې ډلې په یوه اعلامیه کې ویلي چې د سهار شاوخوا اته نیمې بجې یې د ا.ا.ا یو موټر په نښه کړی او یو قوماندان په ګډون یې څلور کسان وژلي دي. د دې ادعا خپلواک تایید نه دی شوی او د پولیسو له روایت سره ټکر لري.
سیمهییزو سرچینو رسنیو ته ویلي چې چاودنه په هغه ځای کې شوې چېرته چې ورځني مزدوران سهار وختي راټولېږي، او ا.ا.ا ځواکونو هوايي ډزې وکړې څو خلک پېښې ځای ته نږدې نه شي. د همدې سرچینو په وینا، له پېښې وروسته له ۴۰ ډېر کسان نیول شوي.
دا چاودنه په وروستیو ورځو کې په فیض اباد کې د امنیتي پېښو د لړۍ تازه کړۍ ده. د یکشنبې په ورځ (د تلې ۱۲مه / اکتوبر ۴) د ښار په شپږمه ناحیه کې یو بم چې په موټرسایکل کې ځای پر ځای شوی و وچاودېد او د ا.ا.ا د استخباراتو کارکوونکي یې په نښه کړل. د ملي مقاومت جبهې وروسته د دې برید مسؤلیت ومانه او ا.ا.ا د خپل یوه استخباراتي کارکوونکي د وژل کېدو تایید وکړ.
سرچینه: شينهوا، کابل ناو، خامه پرس، افغانستان انټرنشنل
نظرونه (۰)
تر اوسه کوم نظر نشته. لومړی نظر تاسو ولیکئ.